Søk i nettsamfunnet

Me nærmar oss jul, og no er det absolutt siste runde med innsamling av opplysningar til Gards- og Ættesoga for Luster kommune - band XII. Eg har i mange år slite med huslyden til Anna Sophie Leyrdahl (1720-1774), som i andre ekteskap gifte seg med Emanuel Fredrik Rose (1706-1774), soknepresten til Suldal. Huslyden har vore drøfta før, mellom anna i denne emnet: https://forum.arkivverket.no/topic/171255-jonas-hansson-leyrdal-1684-1743-sokneprest-lærdal-gardbrukar-kroken-hafslo/ Mange av detaljane som eg opphavleg leitte etter, er sidan dukka opp, men eg plagast med ein del detaljar, og no vonar eg at nokon kan hjelpa meg vidare? Her følgjer eit oppdatert manuskript: ~~~~~~~~~~~~~~~ Anna Sophie Jonasdotter Leyrdahl, døypt i Lærdal 2.6.1720, Anna Sophie kom truleg heller aldri til å bu i Hafslo. Ho gifte seg første gongen i Lærdal 20.6.1736 med Jens Christopherson Kraft frå Ringebu. Han var son av sokneprest Christopher Jensson til Ringebu, opphavleg frå Eidsvoll, og kona Margretha Fredriksdotter Monrad frå Øyer og f. på Eidsvoll 8.6.1704. Jens vart student i 1721 og cand.theol. i 1724. Han var kapellan til Ringsaker frå 1727 til 1728 og sidan kapellan til Ringebu til han 30.9.1735 vart utnemnd til sokneprest til Vang i Valdres der han visstnok d. ?.1.1741. Anna Sophie gifte seg so att i Lærdal 24.10.1742 med Emanuel Fredrik Fredrikson Rose frå Christiania. Han var son av stadskirurg Fredrik Emanuelson Rose i Christiania og kona Kirsti Jørgensdotter Kramer, visstnok òg frå Christiania, og døypt i Christiania 9.1.1706. Emanuel vart student i 1725 og sidan cand.theol. og var frå 1738 kapellan til Land til han i 1748 vart tilsett som sokneprest til Suldal og flytte dit. Emanuel og Anna Sophie var òg gardbrukarar på Mehus i Suldal, men Emanuel d. i Suldal 11.8.1764, og etter nokre år på Mehus flytte Anna Sophie til Vardal prestegard i Vardal der ho d. 3.7.1774. Anna Sophie fekk i alt elleve born, tre frå første ekteskapet og åtte frå det andre: a. Margretha Jensdotter Kraft, f. i Vang sommaren 1737, vart gravlagd i Moss 23.6.1773. Margretha gifte seg truleg i Suldal kring 1765 med Holger Christianson Grønbech frå Moss, døypt i Moss 4.4.1732. Han vart gravlagd i Moss 17.12.1773. Holger vart student i 1751 og cand.jur. i 1761. Han praktiserte sidan som sakførar (prokurator), og han og Margretha budde nokre år på Øye i Hjelmeland til dei kring 1769 busette seg i Moss. Dei fekk fire born i lag. b. Maren Jensdotter Kraft, f. i Vang våren 1739, budde 1741 hjå besteforeldri i Lærdal og d. visstnok der alt hausten 1741. c. Ovidia Kirstine Jensdotter Kraft, f. i Vang sommaren 1740, d. i Bergen 28.12.1793. Ovidia gifte seg i Årdal 27.4.1766 med enkjemannen Hartvig Christopher Vollrathson von Linstow frå Karow nær Berlin, Tyskland og truleg f. der kring 1710. Han vart gravlagd i Bergen 28.9.1782. Hartvig gifte seg første gongen i Lærdal 6.7.1757 med Cathrine Eleonora Fredriksdotter Lohmann frå Bergen, truleg f. i København, Danmark 10.3.1728. Men Cathrine d. i Årdal alt 12.7.1759. Hartvig von Linstow vart 19.4.1745 utnemnd til bergjunkar og vart sidan direktør for kopparverket i Årdal, men flytte sidan til Bergen. Hartvig fekk i alt tre born; av dei var to søner frå andre ekteskapet med Ovidia Kraft. d. Jens Kraft Emanuelson Rose, f. i Vang ?.3.1742, d. som student i Vardal 11.7.1777, ugift. e. Maren Christine Emanuelsdotter Rose, f. i Land 7.11.1743, d. i Vardal 10.4.1782. Maren gifte seg ¤¤¤¤¤ (vigselsstaden hennar?) 1.5.1764 med Paul Christopher Nilsson Holbye frå Skjold i Ryfylke, f. i Stange 8.8.1740. Han d. i Fet 9.9.1791. Han gifte seg 13.2.1783 att i Sørum med Gjertrud Marie Ovesdotter Wangensteen frå Vilberg øvre i Sørum, truleg f. i Skedsmo 7.2.1760. Ho d. som enkje på Tangen i Strømsø 21.1.1832. Paul vart cand.theol. i 1763 og kort etter personleg kapellan til Suldal. I 1766 flytte han til Stavanger, men 14.7.1773 vart han utnemnd til sokneprest til Vardal. Han fekk 16.9.1789 so same stillingi i Fet, der han budde levetidi ut. Som enkje flytte Gjertrud først attende til Vilberg øvre i Sørum og sidan vidare til Tangen i Strømø. Paul Holbye fekk i alt tolv born; av dei var elleve frå første ekteskapet med Maren Rose. f. Jonas Fredrik Emanuelson Rose, døypt i Land 3.8.1745, ¤¤¤¤¤ (n. 1775 – men IKKJE n. 1777 – døydde han mellom 1775 og 1777? – lagnad? – styrmann!) g. Hans Leyrdahl Emanuelson Rose, f. i Land 7.12.1746, d. i Bergen 10.2.1815. Han gifte seg ¤¤¤¤¤ (dato og stad for vigsli hans? – før 1795!) med Anna Helvig Kaisdotter Thorup frå Vibransøy i Torvestad, døypt i Torvestad 19.6.1763. Ho d. i Bergen 10.3.1857. Hans Rose var jurist og arbeidde under fleire embetsmenn til han 6.3.1793 vart toll- og kryssbetjent i Arendal. Han var sidan overtollbetjent i Aalborg i Danmark til han 9.5.1809 vart tilsett som opplagsskrivar og taksadør i Bergen og flytte dit. Hans og Anna fekk ei dotter i lag. h. Nils Dorph Emanuelson Rose, døypt i Land 26.6.1748, ¤¤¤¤¤ (n. 1758 – tydeleg avliden før 1775!? – lagnad?) i. Emanuel Fredrik Emanuelson Rose, f. i Suldal kring 1750, vart gravlagd i Bud 28.10.1805. Emanuel gifte seg i Bud 23.5.1786 med Anna Gjedde Johansdotter Myhlenphort frå Viken i Bud, døypt i Bud 1.11.1764. Ho d. som enkje på Søvik i Borgund 28.5.1838. Emanuel Rose var i mange år handelsmann på Løken i Haram, men i 1799 vart det slutt, og han flytte til Kjerstad i Haram der han siste åri livnærte seg som fiskar. Dei fekk sju born i lag. j. Jørgen Fredrik Emanuelson Rose, f. i Suldal kring 1753, ¤¤¤¤¤ (n. 1775 – men IKKJE n. 1777 – døydde han mellom 1775 og 1777? – lagnad? – styrmann!) k. Anna Sophie Emanuelsdotter Rose, f. i Suldal kring 1756, d. som klokkarkone på Mjøseng i Sigdal 8.5.1834. Anna Sophie gifte seg i Fet 27.12.1791 med Harald Hansson frå Utterset under Myre i Vardal og døypt der 18.12.1757. Han d. som klokkar på Mjøseng i Sigdal 16.9.1835. Harald var urmakar, og han og Anna Sophie budde først nokre år på Kongsberg, men flytte kring 1796 til Rollag der Harald var klokkar. Parfolket budde på Landsverk lille og sidan på Bergeid, men flytte i 1810 til Mjøseng i Sigdal der Harald heldt fram som klokkar levetidi ut. Dei fekk tre søner i lag. ~~~~~~~~~~~~~~~ Eg takkar so mykje på førehand for alle gode tips!

Paul Christopher (Nilsson) Holbye, fødd i Stange 1740, kom i 1763 som kapellan til Suldal og gifte seg 1.5.1764 med Maren Christine (Emanuelsdotter) Rose, fødd i Land 1743, men dotter av den dåverande soknepresten i Suldal, Emanuel Rose. Kyrkjebøkene frå Suldal synest mangla for denne perioden, so kvar er denne vigselsdatoen komen ifrå? Paul vart sidan sokneprest til Vardal og til sist til Fet. Om nokon kan hjelpa meg finna denne vigsli og vigselsstaden, ville eg setja kjempestor pris på det og takkar so mykje på førehand for alle gode tips!