Søk i nettsamfunnet

Paul Larsen Urvigkraaen er gravlagt 17. januar 1811 i Borgund. Han er då oppgitt å vere 61 år gammal, altså fødd omkring 1750. https://www.digitalarkivet.no/kb20070903620645 Han var ved folketeljinga i 1801 gift med Johanne Pedersdatter Urviig. Han er i sitt andre, og ho i sitt første ekteskap. Han er skriven å vere plassemann med jord, og er oppgitt å vere 58 år, altså fødd rundt 1743. På plassen bur også Johanne sin far Peder Andersen på 72 år og kona hans, Siri Clausdatter. Om Siri er mor til Johanne er uvisst, i og med at faren har vore gift før. https://www.digitalarkivet.no/census/person/pf01058419001256 Paul og Johanne hadde 3 søner: Lars, døypt 2. søndag i advent 1796. https://www.digitalarkivet.no/kb20070903610362 Han er ikkje nemnd i folketeljinga i 1801, så har er då truleg død. Peter Martinus, døypt 17. juni 1798. https://www.digitalarkivet.no/kb20070903610371 Stener Martinus, døypt 6. april 1800. https://www.digitalarkivet.no/kb20070903610382 Paul hadde også ei dotter, Anne, fødd ikring 1778. Ved skiftet etter Paul 25. mai 1812 er det sagt at ho var 34 år. Av dei tre sønene i andre ekteskap er det berre Petter på 13 år som lever. https://www.digitalarkivet.no/sk20090128680162 Skiftet er elles svært vanskeleg å tyde, så eg forstår ikkje så mykje av det som er skrive der. Buet ser ut til å ha liten verdi. Spørsmålet er kven denne Paul Larsen Urvigkraaen er. I eit slektstre i Geni finn eg at faren skal vere Lars Jakobsen Kalvestad/Korsen og at mora skal vere ei Else Hansdatter Kalvestad. Men det er ikkje sagt kvar desse opplysningane kjem frå. https://www.geni.com/people/Paul-Kråna/6000000108593519852 Noko som gjer det heile litt interessant, er fadderlista til Peter Martinus Paulsen Kraaen. Her er det opprekna ei imponerande liste av kondisjonerte folk: C. Abelseth, msn. Munk, mons. N. Astrup, madme. Lovisa Wingaard, og jomfru Stine Abelseth. Om eg ikkje tek feil er det snakk om Christoffer Abelseth, Nikolai Astrup, prost i Ørskog, Lovisa Wingaard er vel kona til kjøpmannen Nikolai Ulrik Wingaard, og jomfru Stine Abelseth er kanskje Kristine Abelseth, kona til Nikolai Astrup og syster til Christoffer Abelset. Kven msn. Munk var, veit eg ikkje. I dåpen til Lars Larsen Kraaen er også "msn. Astrup paa Sørnæss" fadder. Men i Stener sin dåp er ingen av dei ovannemnde fadrar. Det eg vil fram til er at desse fadrane elles berre er fadrar til velkondisjonerte borgarar sine born. Eg har bladd i dåpsprotokollane og funne at det er tilfelle. Så då er spørsmålet: Kom Paul Larsen Urvigkraaen frå ei kjøpmannsætt i Borgund? Kva etternamnet hans var før han kom til Urvigkraaen veit vi ikkje. Det er ein borgar Ole Larsen på Slinningen som er gravlagt saman med broren Knut Larsen Slinning i 1789. https://www.digitalarkivet.no/kb20070903610491. Kan desse ha vore brørne til Paul? Dette er sikkert eit skot i blinde, men kanskje verdt å nemne. Kan formyndaren til Anne frå første ekteskapet, Lars Larsen Kipperberg, vere ein slektning, eventuelt bror til Paul? Ifylgje bygdeboka for Grytastranda i gamle Borgund, seinare Haram og no Ålesund, kjøpte Peter Andreas Paulson Kraaen i 1831 Pergarden, Engeset 1 på Grytastranda. Ein kan spørje seg kvar han tok pengane frå, oppvaksen som han var på ein fattigsleg plass på Sula. Kan han ha spelt på sine og faren sine kontakter eller slektningar?