Britha Johnsdotter Kalhagen/Rønnei - fødd i Hafslo 12.6.1838 - skal ha utvandra til Amerika kring 1861 og døydde i Minnesota kring 1930 - var gift anten med «Mr.» Reed eller med «Mr.» O'Neil - let det seg gjera løysa denne kjempeutfordringi?

[Lars E. Øyane]

Dette er ei kjempeutfordring som eg fekk «servert» for 30 år sidan, men som eg aldri greidde å løysa.  Kanskje er no tidi kommi?

 

Britha Johnsdotter, fødd i Luster 12.6.1838 som dotter av John Nilsson (1795-1851) og kona Gjertrud Asbjørnsdotter (1807-1857), husmannsfolk i Lunden anten under Kalhagen eller Rønnei i Luster. 

 

I 1859, medan ho tente i Marifjøra i Hafslo, fekk Britha ei dotter Johanna Andersdotter (1859-1941).  Denne jenta voks opp som fosterdotter hjå ein gardbrukar på Joranger i Hafslo, men vart sidan gift og busett i Sogndal.

 

Truleg var det ein etterkommar etter Johanna som for over 30 år sidan fortalte meg at Britha «Bertha» utvandra til Amerika, og det skal ha skjedd kring 1861.  Ho skal ha butt i Houston Co., MN og var gift der anten med ein «Mr.» Reed eller med ein «Mr.» O'Neil.  Ho skal vera avlidi i Amerika kring 1930, og truleg kom det den gongen arv til Noreg, for ho fekk ingen born i ekteskapet sitt!

 

Som sagt greidde eg ikkje å løysa denne kjempeutfordringi den gongen, men eg ville vorte svært so glad om det let seg gjera i dag og takkar so mykje på førehand for alle gode tips som kan bidra til identifikasjon av Britha «Bertha» og mann hennar!

[Lars E. Øyane]

Eg kan leggja til at Britha «Bertha» hadde ei søster som utvandra til Amerika:

 

Martha Johnsdotter, fødd i Luster 25.1.1848, gifte seg i Hafslo 12.2.1875 med Hans Jacobson Vedvig, fødd i Hafslo 10.3.1856.  Dette parfolket utyvandra i 1876 til Buffalo Co., WI, men ikkje lenge etter flytte dei vidare til ein farm i New Prairie township, Pope Co., MN for so kring 1896 å busetja seg på ein farm i Burnhamville township, Todd Co., MN.  Hans d. i Todd Co., MN 30.4.1925, medan Martha Vedvig døydde i Little Falls, MN 2.3.1937.  Det var ti born i denne huslyden!

 

Men om dette hjelper å finna att sølsteri Britha «Bertha», veit eg ikkje...

 

Eg takkar på ny for alle gode tips!

[Lars E. Øyane]

Eg vil i kveld gjerne få henta fram att denne kjempeutfordringi som har lege urøyrd dei siste fire vekene.

 

Det er verkeleg eit stort mysterium kvar det vart av denne jenta i Amerika, og eg vonar i det lengste på at ein eller annan kan hjelpa meg finna ut kvar det vart av Britha i Amerika!

 

Ein ny kjempetakk for alle gode tips, og Godt Nytt År til alle!

[Lars Waaltorp]

På FamilySearch ser jeg at Britha er koblet sammen med Ingebrigt Torstensen (Thompson), født 11.6.1836 i Hafslo. Er det riktig Britha, eller er det en sammenblanding med en annen Britha?  https://www.familysearch.org/tree/person/details/KGCY-5XY

 

[Lars E. Øyane]

Hjarteleg takk til Lars W. for eit spennande og utfordrande innlegg.  Det var som nemnt sist på 1980-talet at eg jobba med utfordringi kring Britha Johnsdotter første gongen, og den gongen stod eg «bom fast».  Då eg so i 2006/2007 kom fram til Ingebrigt Torstenson frå Josvanger i Hafslo, oppdaga eg at kona hans hadde svært mykje til felles med Britha Johnsdotter frå Lunden, og eg sette opp følgjande manuskript:

 

~~~~~~~~~~~~

 

Ingebrigt Torstenson {Josvanger}, f. {i Hafslo} 11.6.1836,

Ingebrigt Thompson utvandra til Amerika i 1866 og gifte seg i Dane Co., Wis. 8.9.1866 med Britha Johnsdotter frå Lunden under Kalhagen i Luster, i Amerika kjend som Bertha Johnson.  Ho var f. i Luster 12.6.1838, men utvandra òg til Amerika i 1866.  Ingebrigt og Bertha slo seg ned som farmarar i Naples township, sidan ein del av Mondovi township, Buffalo Co., Wis., men flytte kring 1905 som pensjonistar inn til sjølve Mondovi, Buffalo Co., Wis. der Ingebrigt d. 20.11.1910.  Bertha Thompson d. same staden 29.4.1926.  Dei fekk sju born:

a. Maria Gertine, kjend som Mary J. Thompson, f. i Dane Co., Wis. 3.10.1866, d. i Minneapolis, Minn. 12.2.1944.  Mary gifte seg kring 1893, uvisst kvar, med John T. Sines, f. i Columbia Co., Wis. 30.11.1863.  Han d. i Minneapolis, Minn. 6.3.1949.  John var i mange år vognkøyrar og sidan hotellvert (“drayman and hotel keeper”), og han og Mary budde i Spooner, Washburn Co., Wis. til dei kring 1915 flytte til Rice Lake, Barron Co., Wis. der John livnærte seg som sjåfør (”stage coach driver”).  Sist i 1920-åri flytte dei so til Minneapolis, Hennepin Co., Minn. der John arbeidde som vaktmeister (”janitor”).  Dei fekk fire born i lag.

b. Johan, kjend som John I. Thompson, f. i Dane Co., Wis. 11.10.1867, d. i Hinckley, Minn. 4.12.1930.  Han gifte seg i Mondovi, Wis. 18.12.1895 med Christine Christianson, dotter av husmannssonen Gjert Christenson frå Haugen under Ottum i Luster (1840-1880).  Ho var f. i Luster 7.11.1866, men utvandra med foreldri sine til Amerika i 1869 og d. i St. Paul, Minn. 17.2.1960.  John var sjåfør (“stage coach driver”), og han og Christine budde i Mondovi, Buffalo Co., Wis., men vart skilde kring 1914, og John flytte då til Hinckley, Pine Co., Minn. der han sidan livnærte seg som farmarbeidar (”farm laborer”).  Han var i Minnesota kjend som ”One-Eyed Thompson”.  John og Christine fekk fem born i lag.

c. Caroline, kjend som Lena Thompson (1870-1957), vart gift med gardbrukarsonen Anders Einerson frå Øygarden i Hafslo (1864-1957) (s.d.).

d. Thomas E. Thompson, f. i Buffalo Co., Wis. 24.8.1872, d. visstnok i 1949, men dato og stad er ukjende.  Thomas gifte seg første gongen i Buffalo Co., Wis. 26.5.1895 med Olina, kjend som Lena Arneson, f. i Buffalo Co., Wis. 21.5.1871.  Ho d. i Mondovi, Wis. 16.8.1910, og Thomas gifte seg att i Mondovi, Wis. 4.11.1914 med Eva Melvina Jaquish, f. i Buffalo Co., Wis. 26.11.1877.  Ho d. i Eau Claire, Wis. 16.1.1936.  Thomas var ei tid kveghandlar (“cattle buyer”) og budde mange år i Mondovi, Buffalo Co., Wis., men flytte sidan til Eau Claire, Eau Claire Co., Wis. der han var fabrikkarbeidar (“factory worker”).  Han fekk i alt sju born, seks frå første ekteskapet og eitt frå det andre.

e. Albert Thompson, f. i Buffalo Co., Wis. 24.8.1874, d. i Mt. Vernon, Wash. 15.9.1950.  Albert gifte seg i Mt. Vernon, Wash. 29.5.1907 med Mary Grace Marston.  Ho var f. i Beadle Co., S.D. 29.9.1885 og d. i Mt. Vernon, Wash. 22.12.1957.  Albert flytte i ung alder til vestkysten og dreiv røyrleggjarforretning (“plumbing business owner and operator”) i Mt. Vernon, Skagit Co., Wash. der parfolket budde levetidi ut.  Dei fekk sju born i lag.

f. Johanna Thompson, f. i Buffalo Co., Wis. 4.3.1877, d. i Mondovi, Wis. 25.6.1975.  Johanna gifte seg i Mondovi, Wis. 10.10.1901 med Anton Ludwig Mickelson.  Han var f. i Buffalo Co., Wis. 8.4.1875 og d. i Mondovi, Wis. 16.11.1954.  Anton og Johanna Mickelson farma i Mondovi township, Buffalo Co., Wis. og fekk seks born.

g. Nels Thompson, f. i Buffalo Co., Wis. 19.9.1879, d. i Eau Claire, Wis. 30.5.1948.  Nels gifte seg i Mondovi, Wis. 20.9.1909 med Winnie Borst.  Ho var visstnok f. i Buffalo Co., Wis. 22.1.1887 og d. i Rock Co., Wis. 9.8.1970.  Nels var først postbod (“mail carrier”), og parfolket budde i Mondovi, Buffalo Co., Wis., men flytte i 1914 til ein farm i Prairie Lake township, Barron Co., Wis. der dei budde til dei i 1946 tok pensjon og flytte inn til Chetek, Barron Co., Wis.  Dei fekk fire born.

 

~~~~~~~~~~~~

 

MEN, det er fleire avvik frå dei opplysningane som eg hadde om Britha Johnsdotter frå Lunden, mellom anna namnet på mann hennar, at ho skulle vera barnlaus og at ho døydde i Houston Co., MN, so eg var ikkje 100% sikker på om dette verkeleg var same jenta, inntil eg fann denne vigsli i Perry Lutheran church i Dane Co., WI 8.9.1866:

 

https://www.ancestry.com/interactive/60722/41742_314952-00732?pid=6827637&backurl=https://search.ancestry.com/cgi-bin/sse.dll?indiv%3D1%26dbid%3D60722%26h%3D6827637%26tid%3D%26pid%3D%26usePUB%3Dtrue%26_phsrc%3DNzx15486%26_phstart%3DsuccessSource&treeid=&personid=&hintid=&usePUB=true&_phsrc=Nzx15486&_phstart=successSource&usePUBJs=true

 

Etter dette må me vel kunne seia at denne kjempeutfordringi er løyst, og er kjempenøgd!